Hamu angka dongan, ra nunga hea mungkap on di loloan on, dia do dumenggan surat on di undangan marbahasa Batak; Gonghon, Gokhon, Gokkon manang Gongkon?
Di Kamus Batak-Indonesia J.P Sarumpaet tarsurat songon on:
“gong, tetap ada di tempat; jangan bepergian;
manggonghon (sering salah dieja sebagai manggokkon) mengundang; artinya: pada suatu hari tertentu ada pesta, maka penduduk desa diminta gong di desa, jangan bepergian (Ump. Gonghon paimaon, joujou alusan; harf: permintaan untuk gong kami taati dan kami akan tetap ada di tempat, panggilan untuk pesta akan kami laksanakan, kami datang).”
Molo sian hata batak na polin, ba Gonghon do na dumenggan surathonon, alai tutu panjahana “Gokkon.”
Mardomu tu hatorangan na di ginjang i, pandapothu ma on: molo disurathon di surat undangan “Gonghon dohot Joujou,” dua do na nidokna, parjolo asa gong ma angka dongan sahuta, hot di huta i unang laho maronan manang tu balian di mata ni pesta i; paduahon, joujou ma tu hombar balok dohot angka tamue parhuta na dao, asa ro nasida di ari naung binuhul tu huta ni na manggonghon ondeng.
Alai boha do ia taringot tu joujou?
Na dua hata on na marmula do sian ulaon na metmet di halak Batak. Molo naeng marulaon sasahalak di sada huta, digonghon ma dongan sahuta. Digonghon mandok ditogang, asa gong di huta di ari na tinontuhon i; unang laho tu balian, tu tombak manang tu pardalanan.
Di mulana, dipasahat ma di ombas i pudunpudun, i ma sada baion na dipuduni. Molo sampulu ari nari ma tingki ni parpestaan i sian ari panggonghonon i, dibahen ma pudunna sampulu; molo pitu ari nari, pitumpudun. Ganup ari, tanggalan ni na manjalo i ma sampudun, jala molo dung sidung sude pudunpudunna i marlapatan ma i, i ma ari na binuhul i. Gong ma nasida di huta/jabu, ndang laho agia tu dia. Dung tipak sude dibahen hasuhuton, nunga jumpang be tingki mangan disuru ma na manjou angka dongan sahuta asa ro, ai nunga rade sude. I ma na ginoar joujou. (Di taon pitupuluan, hujalo hami dope pudunpudun sisongon i di Sibolga sian angka dongan na marulaon).
Lam leleng, dihonahon ma i tu ulaon na umbalga, isara tu unjuk. Tontu do, ndang tarbahen be patupa joujou anggo disi, ai ndang holan isi ni sada huta na ginonghon, dohot do sian huta manang luat na asing. Sian i ma parbonsiranna, gabe rap dipasahat ma na dua i di sada tingki; i ma gonghonna, laos i ma dohot joujouna.
Botima.
