Nunga Habis Mangalap Gogona Ina i

Di ingot hamu dope tahe Dongan, tingki tubu anggi manang iboto, ribur-ribur torus jolma di jabu, sahat tu tonga ni borngin? Diingot hamu dope tahe maranggap?

Molo huingot i daba, songon na asi do rohangku marnida angka dongan Ina i. Nunga habis gogo ni Ina i laho mangodon, nunga mansai hansit dihilala, jala nunga mansai loja dagingna huhut borat simalolongna. Neang modom ma nian dipagidohon rohana.

Alai ndang tarbahensa. Ipabolak do amak di lambung ni partataringan ni Ina i. Ro ma angka na torop laho marnida. Baoa do manangna borua? Songon doa do ulaning leat ni poso-poso i?

Dapotma muse borngin. Simalolong lamu tunduaon. Hape tparsiroma muse angka punguan Ama. Hundul be sude i amak na bolak i. Ipangido tes manis manangna kopi. Adong dope muse namangido tuak dohot namangido anggur cap bulan. Soara ni kartu mallataklatak isampathon tu atas ni amak i. Alai naummagoan, marisapi sude do angka Amanta i. Sude ma tutu timus martimpul, gabe sehera namanutung ramba-ramba di robean ma berengon jabu paranggapan i.

Molo hahipason ni dakdanaki, hera na so adong do namanganturehon. Songoni tabo ma dihilala posoposo i tingki ibagasan siubeon ni Inana ibana. Hape disi ro ibana tu portibion, tordipaksa angka Ama i do dakdanak i dohot mangisap timus-timus i.

Ina, na sae manubuhon, mansai jotjot do ‘masuk angin’. Somalna molo ‘masuk angin’ porlu ma ‘kaluar angin’. Santabi loloan, porlu do muntut Ina na baru manubuhon. Alai ra itaonton Ina i ma ‘gombung’ butuha na i ala ni torop ni jolma namaranggap. Manang tingki margakargak mengkel angka paranggap i, baru pe ipalua Ina i angka nanaeng sipaluaon na.

Dang holan i muse. Tangis ma posoposo i, naeng leanon ni Ina i ma posoposona i manarus. Alai tung mansai maila do ibana mangulahon i, tarlumobi ma molo sada urang dope inanta i, ai boha ma, sipata dohotdo angka Amangbao-na maranggap.

Tuanima dapot borngin papituhon. Nangpe laho hepeng laho manuhor angka gula, kopi, jala ingkon paradeon angka lampet, pohul-pohul, manangna kue-kue, alai anggo roha ni Ina i, nunga mansai lumbang. Boha pe, molo dung sae tutup anggap, di borngin na naeng ro, nunga boi ‘bebas’ ina i, boi renges modom, boi lumbang marhosa, dang sae dohot be Ina dohot posoposo i mangisap timus ni sigaret sirabun i.

Nunga tung loja Ina i, naeng nok matana, naeng gomos haolonna poso-poso na i di podomanna i. Eta tapaloas ma na loja mangalap gogona. Tapaloas ma na tunduan, modom.
Unang be tatambai sitaonon ni Ina nabaru sae manubuhon.

Botima. Horas!

Facebook Comments